Programar, unha función máis do docente

Bo día!

Good morning!

Bonjour!

¡Buenos días!

Hoxe toca falar un pouco de teoría, xa que na sesión do mércores con Carlos tratamos principalmente o tema da programación. Este tema xa o teríamos que ter bastante controlado da materia de Deseño Curricular e Organización de Centros Educativos do módulo común, pero por motivos que todos coñecemos, creo que nos veu ben o repaso para ter todo claro e que as nosas nocións sobre este tema non se baseen só na elaboración de dúas unidades didácticas sen ningunha explicación previa a maiores da frase: «No os preocupéis, hay un montón en Internet que os pueden servir de modelo». 

Ben, queixas a parte, a explicación de onte comezou recordando o pouco que nos quedou claro da materia que comentei antes: a estrutura do unidade didáctica. Ao principio Carlos tamén nos explicou as utilidades que ten programar; entre elas atópanse as de organizar e planificar o traballo e tamén é moi importante nos casos de sustitución para que o profesor sustituto teña a onde recurrir para saber que contidos ten que dar, cales xa deberían saber os alumnos, que obxectivos se teñen que cumprir, ... Despois pasamos á explicación das partes da programación nun centro (programación didáctica e programación de aula), as distintas fases na programación dun centro (programación didáctica, programación do curso e programación de aula), as fontes ás que recurrir para levar a cabo a programación (fontes didácticas, fontes psicolóxicas, fontes socilóxicas e fontes epistemolóxicas) e, por último, a estrutura da programación didáctica comparándoa coa da unidade didáctica á que se parece moito, só que esta útlima ten un maior nivel de concreción.

Antes do descanso, vimos a convocatoria das oposición deste ano, algo que nos podía parecer máis preto no tempo que aplicar todo o aprendido á hora de traballar nun centro. Gracias a isto entendemos que o contido desta clase será moi importante telo claro, non só para o exercicio da nosa profesión, xa que eleborar unha programación didáctica, unha programación de aula e unha unidade didáctica son funcións que  vamos ter que levar a cabo como docentes, senón que tamén para poder acceder a esa profesión mediante as oposicións onde nos pedirán que elaboremos e presentemos unha programación de aula.

Paréceme impotante reflexionar, como fai Aida na súa última entrada Érase una vez... el mundo de programar!, sobre a práctica que se da (por desgracia) en bastantes centros de reciclar as programacións dun ano para outro sen adaptalas aos novos alumnos nin aos cambios que se poidan ir producindo no contexto do centro ou no mesmo centro. Como xa comentei na dita entrada, creo que iso só leva a reducir o nivel do noso sistema educativo e, engadirei ademais, que así só se suman argumentos a favor da visión do docente que hai hoxe en día nunha gran parte da sociedade. A visión á que me refiro é a do profesor como unha persoa á que a seguridade de ter un posto fixo a levou a acomodarse e non esforzarse no seu traballo. Creo que Carlos, na sesión do pasado mércores, tratou de concienciarnos de que para ser uns bos docentes terémonos que esforzar en todas as funcións que nos corresponden e de que estas van moito máis alá de explicarlles uns contidos aos nosos alumnos.

Para rematar esta entrada sobre a progamación, aquí vos deixo un resumo do que para min foi máis lioso da explicación feito coa aplicación Glogster, recomendada pola nosa compañeira Cristina na súa entrada Second Class e coa que tamén traballamos onte na materia de Estratexias de Innovación Docente no Campo das Linguas Estranxeiras. Espero que vos sexa de axuda! 

Déixovos aquí tamén o enlace para que o poidades ver máis grande: Glogster Programación.


Ata a próxima!