A escritura e as clases de inglés

Ola a tod@s!

Salut à tous!

Hi everyone!

¡Hola a tod@s!

Hoxe quería contarvos que son unha persoa á que lle encanta escribir, non no sentido de crear historias inventadas ou sobre o meu pasado, obras de teatro, poemas ou ensaios (que tamén); pero aquí refírome á acción en si, o feito de coller un papel e un bolígrafo e comezar a ordenar as miñas ideas; ben sexan apuntes, a lista da compra ou pensamentos sobre calquera tema. Arriscándome a que pensedes que vivo no século pasado direi, tamén, que se é cun bolígrafo e en papel, mellor. Escribir nun teclado, para min, non é o mesmo, si que me gusta, xa que ao fin e ao cabo o proceso é igual, pero non me transmite a mesma sensación. E preguntarédesvos: a que vén isto? Pois fago esta entrada debido á clase que tivemos o martes con Gonzalo, da materia As linguas estranxeiras no contexto nacional e internacional, na que falamos da destreza da escritura, writing ou l'ecrit. 

A clase comezou coa reflexión que fixen eu ao comezo: cal é a miña actitude xeral cara a escritura?

É importante reflexionar sobre esa pregunta xa que a resposta influíra nas nosas clases aínda que sexa de forma involuntaria. Os docentes aos que nos gusta a escritura sempre tenderemos máis a escribir no encerado ou a darlles aos alumnos material escrito por nós a man; mentres que os que non lles guste empregarán outros recursos. A nosa actitude con respecto á escritura tamén inflúe na ensinanza desta destreza; neste aspecto si que non se debería notar demasiado a nosa actitude, xa que por moito que nos guste escribir non podemos dedicar toda unha semana aos writings nin deixalos de lado no caso contrario.

Na sesión de onte tamén tratamos as diferenzas entre a lingua oral, máis expontánea, desordenada, informal (xeralmente), instantánea, verbal e que se pode servir de outros moitos recursos vocais (entoación) e corporais (xestos) para expresar; e a lingua escrita, máis reflexionada, estruturada, formal ou neutra, nominal e na que se ten que recurrir a outros recursos escritos (puntuación, vocabulario, ...) se se quere transmitir un grao de expresividade semellante ao da lingua oral.

Ademais, coñecemos os dous enfoques que se poden aplicar á ensinanza desta destreza e en que consiste cada un. Un destes enfoques é o dirixido ao produto e consiste na análise e imitación dun texto modelo á hora de crear outro novo; e o outro é o enfoque centrado no proceso no que o novo texto constrúese  a través dunha serie de pasos de planificación e reelaboración de borradores. Tendo en conta o anterior, e os pasos a seguir en cada enfoque para chegar a un texto final, deducimos que o mellor enfoque quizais sexa o centrado no proceso, aínda que incluíndo algúns aspectos do outro enfoque, polo que, unha vez máis, a mellor solución é aquela que inclúe algo de todas as opcións posibles. 


Ata a próxima!